nadipinchu na naava నడిపించు నా నావ నడి సంద్రమున దేవా

పల్లవి:
నడిపించు నా నావ - నడి సంద్రమున దేవా

నవజీవన మార్గమున - నా జన్మ తరియింప
...నడిపించు...

1.
నా జీవిత తీరమున - నా ఆపజయ భారమున

నలిగిన నా హృదయమను - నడిపించుము లోతునకు

నా యాత్మ విరబూయ - నా దీక్ష ఫలియింప

నా నావలొ కాలిడుము - నా సేవ జేకొనుము
...నడిపించు...

2.
రాత్రంతయు శ్రమపడినా - రాలేదు ప్రభూ జయము

రహదారులు వెదకినను - రాదాయెను ప్రతిఫలము

రాక్షించు నీ సిలువా - రమణీయ లోతులలో

రతనాలను వెదకుటలో - రాజిల్లు నా పడవ
...నడిపించు...

3.
ఆత్మార్పణ చేయకయే - ఆశించితి నీ చెలిమి

అహమును ప్రేమించుచునే - అరసితి ప్రభు నీ కలిమి

ఆశా నిరాశాయే - ఆవేదనెదురాయే

ఆధ్యాత్మిక లేమిగని - అల్లాడె నా వలలో
...నడిపించు...

4.
ప్రభు మార్గము విడచితిని - ప్రార్ధించుట మానితిని

ప్రభు వాక్యము వదలితిని - పరమార్ధము మరచితిని

ప్రాపంచ నటనలలో - ప్రావీణ్యమును బొంది

ఫలహీనుడనై ఇపుడు - పాటింతు నీ మాట
...నడిపించు...

5.
లోతైన జలములలో - లోతున వినబడు స్వరమా

లోబడుటకు నేర్పించి - లోపంబులు సవరించి

లోనున్న ఈవులలో - లోటైన నా బ్రతుకున్

లోపించని యర్పణగా - లోకేశ చేయుమయా
...నడిపించు...

6.
ప్రభు యేసుని శిష్యుడనై - ప్రభు ప్రేమలొ పాదుకొని

ప్రకటింతును లోకములొ - పరిశుద్ధుని ప్రేమకధ

పరమాత్మ ప్రోక్షణతో - పరిపూర్ణ సమర్పణతో

ప్రాణంబును ప్రభుకొరకు - పానార్పణము జేతు
...నడిపించు...